बाईकवरची धूम ......
चंद्रालाही लाजवून गेलं असं तुझं हसणं,
खूप आवडतं बाईकवर, तुझ्या सोबत असणं
भेटण्यापर्यंतची अगतिकता, कोंडलेला श्वास
त्यात ट्राफिक, धूळ आणि ट्रक टेम्पोंचा त्रास
मिळेल तसा रस्ता काढत फुटपाथवरून घुसणं
खूप आवडतं बाईकवर, तुझ्या सोबत असणं
मग तू दिसतेस लांबून, वाट बघत थकलेली
इतरांच्या चेहऱ्यांना उत्तर देत, उभ्या उभ्या पकलेली
हिरमुसलेला चेहरा आणि खूप सार रुसणं
खूप आवडतं बाईकवर, तुझ्या सोबत असणं
पाच दहा मिनिटं काही बोलणं होत नाही
लांब रेटल जात, जवळ घेणं होत नाही
रागावलेल्या राणीचं, रुसून फुगून बसण
खूप आवडतं बाईकवर, तुझ्या सोबत असणं
थोडावेळ गेल्यानंतर, पंचनामा होतो
उशीर का केला, म्हणून सगळी कारण देतो
त्यांनंतर हळू हळू, पुढे सरकून बसणं
खूप आवडतं बाईकवर, तुझ्या सोबत असणं
मग सुरु राजा राणीचा, स्वप्नंनगरीचा प्रवास
घट्ट बसते मिठी आणि मोकळे होतात श्वास
खांद्यावरती हात सरकतो, कठीण होता सुचण
खूप आवडतं बाईकवर, तुझ्या सोबत असणं
रोमांचित होताहोता, हॉटेल जवळ येत
कोणी नाही, नजर चुकवून मगच जाता येत
तिथे सुद्धा, हातात तुझं हात घेऊन बसणं
खूप आवडतं बाईकवर तुझ्या सोबत असणं
बिल चुकतं, मन थकत,निघायचे वेध लागतात
डोळे मग दोघांचेही, घड्याळाकडे बघतात
मग मात्र चालू होतं, मनात धूस पुसणं
खूप आवडतं बाईकवर तुझ्या सोबत असणं
निघता निघता रात्र होते, चांदण पडलेलं असतं
हातांनी तुझ्या कवेत मला,घट्ट धरलेलं असतं
पुन्हा नॉर्मल होतं, मग सरकून बसणं
खूप आवडतं बाईकवर तुझ्या सोबत असणं
निरोप घेतेस, निघून जातेस, आठवणी मात्र तश्याच राहतात
मिरर मध्ये पुन्हा पुन्हा, तुलाच माझे डोळे पाहतात
परत कधी ? या उत्तराची वाट बघत बसणं
खूप आवडतं बाईकवर तुझ्या सोबत असणं
कवी किरण
